شاہ عبد اللہ بھی رخصت ہوئے

یہ خبر پوری مسلم دنیا میں   غم اور افسوس کے ساتھ سنی گئی کہ خادم ِ حرمین الشریفین اور سعودی عرب کے فرماں روا شاہ عبد اللہ 90 برس کی عمر میں طویل علالت کے بعد جمعرات اور جمعۃ المبارک کی درمیانی شب خالق ِ حقیقی سے جا ملے ۔وہ ایک عرصے سے پھیپھڑوں کے عارضے میں مبتلا تھے ۔پھیپھڑوں کے انفیکشن کے باعث انھیں پچھلے کئی دنوں سےمصنوعی طریقے سے سانس دیا جا رہا تھا ۔ان کی نماز ِ جنازہ پرنس ترکی بن عبد اللہ جامع مسجد میں ادا کی گئی۔جس میں کئی مسلم ممالک کی اعلیٰ شخصیات نے شرکت کی ۔پاکستان کے وزیر ِ اعظم اور ترک صدر رجب طیب  اردوان نے بھی نماز ِ جنازہ میں شرکت کی ۔سعودی عرب کی تمام مساجد میں بھی شاہ کی غائبانہ نماز ِ جنازہ ادا کی گئی ۔دنیا بھر کے مسلم و غیر مسلم رہنماؤں نے شاہ کی وفات پر گہرے رنج اور افسوس کا اظہار کیا ۔ یہاں تک کہ اسرائیلی سابق صدر شمعون پیریز بھی کہہ اٹھے کہ شاہ عبد اللہ کی موت مشرق ِ وسطی ٰ کے امن کے لیے حقیقی نقصان ہے ، جس کی تلافی نا ممکن ہے ۔

چارلی ہیبڈو کی نئی جسارت

فرانسیسی مزاحیہ جریدے کا عملہ اتنا بڑا نقصان اٹھانے کے باوجود باز نہ آیا ۔ ایک بار پھر اس نے گستاخانہ خاکے شائع کر دیے ہیں ۔ معلوم ہوا ہے کہ گستاخانہ خاکوں پر مبنی یہ جریدہ 7 لاکھ کی تعداد میں شائع ہوا ہے ۔  اس کے ساتھ ساتھ اس جریدے کے عملے نے 50 لاکھ کاپیاں شائع کرنے کا اعلان بھی کر دیا ہے ۔ عام جریدہ اگرچہ صرف فرانسیسی زبان میں ہوتا تھا ، لیکن گستاخانہ خاکوں پر مشتمل یہ جریدہ انگریزی اور عربی سمیت 16 زبانوں میں شائع کیا جائے گا ، جو دنیا بھر کے 25 ممالک میں فروخت ہوگا ۔

اگر کوئی محمد ﷺ سے جلتا ہے ۔۔۔۔۔۔

بدھ کو پیرس سے شائع ہونے والے مزاحیہ سیاسی جریدے "چالی ہیبدو" کے دفتر پر حملہ  ہوا ۔ جس میں 10 صحافیوں اور دو پولیس اہلکاروں سمیت 12 یا 14 افراد ہلاک ہوئے ۔ جب کہ 10 افراد زخمی ہوگئے ۔ ہلاک شدگان میں چیف ایڈیٹر اسٹیفن کاربونئیر سمیت تین کارٹونسٹ بھی شامل ہیں ۔ تفصیلات کے مطابق تین مسلح افراد صبح گیارہ یا ساڑھے گیارہ بجے کے قریب  میگزین کے دفتر میں داخل ہوئے اور اندھا دھند فائرنگ شروع کر دی ۔ سکیورٹی گارڈز کی جوابی فائرنگ پر وہ ایک کار چھین کر بھاگنے لگے تو ایک راہگیر  کچلا گیا ۔ حملہ آوروں اور پولیس کے درمیان  فائرنگ کا تبادلہ ہوا ۔ تاہم وہ فرار ہونے میں کامیاب ہوگئے ۔ اس طرح وہ سکیورٹی گارڈز  کے ساتھ ساتھ پولیس کو بھی چکمہ دینے میں کام یاب ہوگئے ۔ پولیس کے مطابق عینی شاہدین نے بتایا کہ حملہ آور راکٹ لانچر اور کلاشنکوف سے لیس تھے ۔ ان کو یہ کہتے ہوئے سنا گیا : ہم نے پیغمبر ِ اسلام کی شان میں گستاخی کا بدلہ لے لیا ۔ یہ اللہ اکبر کے نعرے بھی لگا رہے تھے ۔ جائے وقوعہ  پر موجود لوگوں کا کہنا تھا کہ انھوں نے نہایت اطمینا ن سے کا راوئی کی ۔ جس سے ثابت ہوتا ہے کہ یہ عام لوگ نہیں ، بلکہ تربیت یافتہ لوگ تھے ۔ "چالی ہیبڈو " کے دفتر پرہونے والا یہ حملہ فرانس میں گذشتہ چار دہائیوں میں ہونے والا سب سے بڑا حملہ تھا ۔

ذکر حبیب ﷺ ، بہ زبان ِ قرآن ِ حکیم

ہمارے پیارے نبی ﷺ کا ذکر ِ خیر ہر ایک نے اپنے طریقے سے کیا ہے ۔ صحابہ کرام رضی اللہ عنہم کے دو رسے لے کر آج تک رسو ل اللہ ﷺ کا ذکر ِ خیر اپنے اپنے طریقوں سے ہو رہا ہے ۔ خود اللہ تعالیٰ نے قرآن حکیم میں مختلف طریقوں سے رسول اللہ ﷺ کا ذکر کیا ہے ۔ کہیں رسول اللہ ﷺ کی اطاعت کو اپنی اطاعت قرار دیا تو کہیں آپ ﷺ کی صفت ِ رحمت کا تذکرہ کیا ہے ۔ ذیل میں ، میں چند آیات کا ترجمہ پیش کرتا ہوں ، جس میں اللہ تعالیٰ نے اپنے حبیب کا ذکر کیا ہے :

---

1۔ آج کا دور بڑا نازک دورہے ۔ اس نازک دور میں اسوہ ِ محمدی ﷺ کی اہمیت اور بڑھ جاتی ہے ۔ رحمت ِ عالم ﷺ کی سیرت سے ہر ایک روشنی لے سکتا ہے ۔ کیا مسلم ، کیا غیر مسلم ۔ اللہ تعالیٰ نے قرآن ِ مجید میں ارشاد فرمایا:

"یقینا تمھارے لیے رسول اللہ (ﷺ) میں عمدہ نمونہ (موجود) ہے ۔ ہر اس شخص کے لیے جو اللہ کی اور قیامت کے دن کی توقع رکھتا ہے اور بکثرت اللہ کی یاد کرتا ہے ۔ (سورۃ الاحزاب ، آیت نمبر 21)

اس آیت سے معلوم ہوا کہ رسول اللہ ﷺ کے اسوہ ِ حسنہ یعنی سنتوں پر عمل کرنے کا حکم اللہ تعالی ٰ نے بھی دیا ہے ۔ جس سے سنت کی اہمیت کا اندازہ بہ خوبی لگایا جا سکتا ہے ۔

2۔ ایک اور جگہ اللہ تعالیٰ نے نبی کی اتبا ع کو اپنی محبت قرار دیا ہے ۔ ارشاد ِ باری تعالیٰ ہے :

"(اے نبی ﷺ) کہہ دیجیے کہ اگر تم اللہ سے محبت رکھتے ہو تو میری تابعداری کرو ، خود اللہ تم سے محبت کرے گا اور تمھارے گناہ معاف کردے گا اور اللہ بخشنے والا مہربان ہے ۔ "( سورہ ِ آل ِ عمران، آیت نمبر 31)

اس آیت سے معلوم ہوا کہ اتبا ع ِ رسول ﷺ سے دو بڑے فائدے حاصل ہوتے ہیں :

1۔ اللہ تعالیٰ کی محبت حاصل ہوتی ہے ۔

2۔ گناہوں کی بخشش ہو تی ہے ۔

یقینا یہ دونوں بہت بڑے فائدے ہیں ۔ جن سے نہ صرف دنیا سنور سکتی ہے ، بلکہ آخرت بھی بن جاتی ہے ۔ ایک سچے مسلمان کے لیے ان دوفائدوں سے بڑے کون سے فائدے ہو سکتے ہیں !

3۔ ایک اور جگہ اللہ تعالیٰ نے رسول کی اطاعت کو اپنی اطاعت قرار دیا ہے ۔چنانچہ ارشاد ہوتا ہے :

"جو اس رسول کی اطاعت کرے ، اس نے اللہ کی فرماں برداری کی اور جو فرماں برداری  نہ کرے تو ہم نے آپ کو کچھ ان پر نگہبان بنا کر نہیں  بھیجا ۔ " (سورۃ النسا ء ، آیت نمبر 80)

4۔ سوال یہ پیدا ہو تا ہے کہ اللہ تعالیٰ نے رسول ﷺ کی اطاعت کو اپنی اطاعت کیوں قرا دیا ۔ اس کا جواب بھی ہمیں قرآن مجید سے ہی ملتا ہے ۔ ارشاد ِ باری تعالیٰ ہے:

"قسم ہے ستارے کی جب وہ گرے ۔ کہ تمھارے ساتھی نے (یعنی نبی کریم ﷺ نے) نہ راہ گم کی ہے اور نہ وہ ٹیڑھی راہ پر ہیں ۔ نہ وہ اپنی خواہش سے کوئی بات کہتے ہیں ۔ وہ تو صرف وحی ہے ، جو اتاری جاتی ہے ۔ "(سورۃ النجم ، آیت نمبر 1 تا 4)

اس آیت سے معلوم ہو ا کہ رسول اللہ ﷺ کا قول و فعل بھی احکام ِ الہٰی سے مزین ہوتا ہے ۔  رسول اللہ ﷺ اسی راہ پر ہیں ، جس راہ پر انھیں اللہ تعالیٰ نے چلا یا ہے ۔اسی طرح آپ ﷺ وہی بات ارشاد فرماتے ہیں ، جو آپ ﷺ کی وحی کی جاتی ہے ۔ ایک اور جگہ ارشاد ہے :

"جو کچھ میرے پاس (یعنی رسول اللہ ﷺ کے پاس)وحی آتی ہے ، میں تو صرف اس کا اتباع کرتا ہوں ۔ "(سورہِ الانعام ، آیت نمبر 50)

رسول اللہ ﷺ کے اوصاف و اخلا ق کے حوالے سے بھی قرآن ِ مجید میں متعدد آیات نازل ہوئیں ہیں۔ یہاں ان تمام آیات کا احاطہ کرنا مشکل ہے ۔ چند آیات کا ترجمہ لکھنے کو کوشش کرتا ہوں۔

5۔ "اللہ کی رحمت کے باعث آپ ان پر نرم دل ہیں اور اگر آپ ترش رو اور سخت دل ہوتے تو یہ سب آپ کے پاس سے چھٹ جاتے ۔سو آپ ان سے در گزر کریں اور ان کے لیے استغفار کریں ۔ "(سورہ ِ آل ِ عمران ، آیت نمبر 159)

اس آیت سے معلوم ہوا کہ ہمارے پیارے نبی ﷺ کو اللہ تعالیٰ کی طرف نرم دل بنایا گیا تھا۔ نیز اس آیت سے یہ بھی معلوم ہوا کہ سخت مزاج لوگوں کے سامنے لاگ نہیں ٹکتے اور انھیں دل سے پسند نہیں کرتے ۔ اس لیے ہمیں بھی اپنے نبی ﷺ کی طرح نرم مزاج ہو نا چاہیے ۔ تاکہ لوگ ہمیں پسند کریں ۔

6۔ "اے اہل ِ کتاب ! یقینا تمھارے پاس ہمار ا رسول آچکا ہے ۔ جو تمھارے سامنے کتاب اللہ کی بکثرت ایسی باتیں ظاہر کر رہا ہے ، جنھیں تم چھپا رہے تھے اور بہت سی باتوں سے در گزر کرتا ہے ۔ " (سورۃ المائدہ ، آیت نمبر 15)

اس آیت سے معلوم ہوا کہ ہمارے پیارے نبی ﷺ عفو و در گزر سے کام لیتے تھے ۔ عفو و درگزر کی سب سے بڑی مثال فتح ِ مکہ کے موقع پر نظر آتی ہے ۔ جب ہمارے نبی ﷺ نے اپنے تمام سابقہ دشمنوں کو بہ دل و جان معاف کر دیا تھا ۔ کاش ! آج ہم بھی ایسے ہوتے ۔ کاش! ہم منتقم مزاج نہ ہوتے !

7۔ "تمھارے پاس ایک ایسے پیغمبر (ﷺ) تشریف لائے ہیں ، جن کو تمھاری مضرت کی بات نہایت گراں گزرتی ہے ۔ جو تمھاری منفعت کے بڑے خواہش مند رہتے ہیں ۔ ایمانداروں کے ساتھ بڑے ہی شفیق او مہربان ہیں ۔ " (سورہ ِ التوبہ ، آیت نمبر 128)

8۔ "پس اگر یہ لوگ اس بات پر ایمان نہ لائیں تو کیا آپ ان کے پیچھے اسی رنج میں اپنی جان ہلاک کر ڈالیں گے ۔"(سورۃ الکہف ، آیت نمبر 6)

"طٰہٰ! ہم نے آپ  پر یہ قرآن اس لیے نہیں اتار ا کہ آپ مشقت میں پڑ جائیں ۔" (سورہ  ِ طٰہٰ، آیت 1۔2)

"آپ (ﷺ) ان کے ایما ن نہ لانے پر شاید آپ تو اپنی جان کھو دیں گے ۔" (سورۃ الشعراء ، آیت نمبر 2)

ان تینوں آیات سے بہ خوبی اندازہ لگایا جاسکتا ہے کہ ہمارے پیارے پیغمبر ﷺایمان نہ لانے والوں کے بارے میں کتنے متفکر اور غم زدہ تھے ۔ خصو صا تیسری آیت ، جس میں اللہ تعالیٰ نے بڑے عجیب انداز میں پیغمبر ِ اسلام ﷺ کی فکر مندی  اور غمزدگی کی تصویر کھنچی ہے ۔ ہم کتنے رحیم و کریم پیغمبر کی امت میں سے ہیں !!

9۔ "اور ہم نے آپ کو تمام جہان والوں کے لیے رحمت ہی بنا کر بھیجا ہے ۔ "(سورۃ الانبیاء ، آیت نمبر 107)

اوپر دی گئی آیات پر اگر آپ غور کریں تو تقریبا ساری آیات رسول اللہ ﷺ کی صفت رحمت سے متعلق ہیں ۔ جس سے معلوم ہوتا ہے کہ ہمارے نبی ﷺ میں صفت ِ رحمت بدرجہ ِ اتم موجود تھی ۔ آج کا مغضوب زمانہ متقاضی ہے کہ ہم صرف رسول اللہ ﷺ کی رحمت والی سنت پر ہی عمل پیرا ہو جائیں تو بہت سے مسائل حل ہو سکتے ہیں ۔ ہر طرف آگ ہے ، نفرتیں ہیں ۔ محبت معدوم ہے ۔ دل کینہ زدہ ہیں ۔ انسانیت کا قتل ہو رہا ہے ۔ کیا ہی اچھا ہو کہ ہم اپنے پیارے نبی ﷺ کی صفتِ رحمت پر تادم ِ مرگ عمل پیرا ہو جائیں ۔

باتیں اور بھی بہت سی لکھنے کو ہیں ۔ لیکن طوالت کا خوف ہے ۔  سو اسی پر اکتفا ہے ۔

تحریر: نعیم الرحمان شائق