بارہ ربیع الاول

میرے آنے سے قبل ہر طرف خوشیاں چھا جاتی ہیں ۔ لوگ مسرور ہوتے ہیں ۔فضاؤں میں نعتوں کے زمزمے گونجتے ہیں ۔ مسلمان اپنے اپنے طریقے سے اپنے آقا علیہ السلام سے عقیدت و محبت کا اظہار کرتے ہیں ۔ میں آتا ہوں تو سب کو خوش کردیتا ہوں ۔ میرے اثرات بہت گہرے ہوتے ہیں ۔ میرے آنے پر اخبارات رنگ برنگے ایڈیشن شائع کرتے ہیں ۔ میگزینوں کے سر ِ ورق روضہ ِ رسول ﷺ سے سج جاتے ہیں ۔ ٹی وی پرگراموں میں نعتیں پڑھی جاتی ہیں ۔ گلی محلوں میں سیرت کے جلسے اور نعتوں کی محفلیں منعقد ہوتی ہیں ۔ بچوں ، بوڑھوں اور جوانوں ۔۔ سب کا ذوق دیدنی ہوتا ہے ۔میں سب کو خوش کر دیتا ہوں ۔ خزاں کو بہار کر دیتا ہوں ۔ عقیدت اور محبت  کو عام کر دیتا ہوں 

.

اپنی آمد پر اس قدر جوش و خروش دیکھ کر مجھے بہت خوشی ہوتی ہے ۔ امتیوں کی اپنے پیارے رسول ﷺ سے اس قدر والہانہ محبت دیکھ کر مجھے بہت خوشی ہوتی ہے ۔ مجھے یوں محسوس ہوتا ہے ،اب سب کچھ بدل جائے گا ۔ ہر ایک اسوہ ِ رسول ِ اکرم ﷺ کی پیروی کرے گا ۔ جس کی وجہ سے امت کا مستقبل سنور جائے گا ۔ امت کی حالت میں بہتری آجائے گی ۔ اس سے بڑی خوشی کی بات کیا ہوگی ۔ آقا علیہ السلام نے امت کو درس ِ اخوت دیا تھا ۔ امت اپنے مہربان رسول ﷺ کے اس درس پر عمل کرے گی ۔ رسول ِ مہربان سراپا اخلاق تھے ۔ آپ ﷺ کے اخلاق سب سے اعلا تھے ۔ امت بھی اپنے اخلاق اپنے رسول ِ اکرم ﷺ کے اخلاق کی طرح بنانے کی کوشش کرے گی ۔ آقا علیہ السلام مہر بان تھے ۔ عفوو درگزر سے کام لیتےتھے ۔ اپنے بڑے سے بڑے دشمن کو معاف کر دیا  تھا ۔ امت میں بھی یہ صفت ِ رحمت پیدا ہو جائے گی ۔ کیوں کہ جس طرح امت میری آمد پر رسول ِ اکرم ﷺ سے عقیدت و محبت کا اظہار کر رہی ہے ، اس سے تو یہی لگتا ہے ۔ اس عمل سے تو یہی محسوس ہوتا ہے کہ امت یک سر بدل جائے گی ۔ اب غربت نہیں ہوگی ۔ امیر ، غریب کا خیال رکھیں گے ۔  مہنگائی نہیں ہوگی ۔ لوٹ مار نہیں ہوگی ۔ ناپ تول میں کمی نہیں کی جائے گی ۔ سڑا ہوا مال ، مہنگے داموں بیچنے کی کوشش نہیں کی جائے گی ۔ لوگ دکھ درد بانٹیں گے ۔ گویا سب کچھ بدل جائے گا ۔ میری آمد کا سب سے بڑا فائدہ یہ ہوگا کہ مسلمانان ِ پاکستان ایک مثالی معاشرہ تشکیل دیں گے ۔ ایک ایسا معاشرہ ، جس کی مثال پوری دنیا میں نہیں ملے گی ۔ 

مگر میری تمام امیدوں پر اس وقت پانی پھر جاتا ہے ، جب میں دیکھتا ہوں کہ کچھ بھی نہیں بدلتا ۔ سب کچھ جوں کا توں رہتا ہے ۔ وہی مسئلے ، وہی الجھنیں ، وہی مشکلیں ۔ نہ نفرت ختم ہوتی ہے ، نہ عداوت تھمتی ہے ۔ نہ عفوو درگزر کے سوتے پھوٹتے ہیں ، نہ دشمن کو معاف کرنے کی سنت کا اجرا ہوتا ہے ۔آقا علیہ السلام کے درس ِ اخوت پر بھی کوئی عمل نہیں کرتا ۔ فرقہ وارانہ تفاوت  جوں کا توں برقرار رہتا ہے ۔ غریب غریب ہی رہتا ہے ۔ امیر اس کا خیال نہیں رکھتا ۔ مہنگائی کم نہیں ہوتی ۔ ناپ تول میں کمی کی عادت جاری رہتی ہے ۔ گویا کچھ نہیں بدلتا ۔  باید و شاید ہی کوئی ہو ، میری آمد جس کی زندگی پر کوئی مثبت اثر مرتب کرتی ہو ۔مجموعی سطح پر کوئی تبدیلی رونما نہیں ہوتی ۔ درحقیقیت امت کے دن اس وقت پھریں گے ، جب مجموعی سطح پر کوئی تبدیلی وقع ہوگی ۔ بہ صورت ِ دیگر کچھ نہیں بدلے گا ۔ 

میرا حقیقی پیغام یہ ہے کہ امت اپنے پیارے رسول ﷺ کے نقش ِ قدم پر چلے ۔ ہر عمل میں ، ہر فعل میں آپ ﷺ کی پیروی کرے ۔ امت کی کام یابی اور کامرانی اسی میں مضمر ہے ۔ اس کے علاوہ اور کوئی عمل نہیں ، جس سے امت کو کام یابی اور کامرانی  حاصل ہو ۔ کاش !! رسول ِ اکرم ﷺ کی امت اپنے پیارے آقا علیہ السلام کی سنتوں پر عمل کرتی !!

تحریر: نعیم الرحمان شائق